Ugņus Lōgi
ETKŪMPS EN ANZANANS

Swāikstisna pagaūwa si. Na stattun sembiskan krāntan, en zeimammans, mes paprettamai auwērptun pintegas skreīlins be etwertun akkins.

Kirsnāi kirsnāi kirsnāi stabāi
En zēimiskamans bāngamans
Wīrta en zēgerins
Per gremjāntins mūtins
En kalpenimans stēisan mettasimtan -

Swāikstisna pagaūwa si. Be auskēndušas lāiwas turmai en jūŗu wīrta en Wītras dwarrins!
Kliptinai be eīskei... kāigi nikaddan en gīwatai
En zēimiskamans bāngamans
Kīrsnas kīrsnas kīrsnas
Āustabawingis stabbas trōns -
Per wītran as dāncau, tēr per wītran as dāncau
En prūsiskas dāngus tīnklamans

Be tikka gremjantī mūti -
Swāikstisna pagaūwa si! - panniskai buccau etwartīnusin si sūnun be tūsimtai mettai wīrta en akkismirkinsnan - kāigi šandēinan, tīt bītan...

Tenā stalāi nagā,
Kruwwina,
Etkūmps maldā -
Sen kruwwinans wārsans
Zwīriskai grazī
Sen kruwwinans rānkans
Stesses grabbewingis spārtis
Sen kruwwinans kreklins
Stesses timras mūteristas -
Ilgisnā wīrta en burrins,
Tīmenis - etkūmps en anzanans! Etkūmps en anzanans!

Swāikstisna pagaūwa si! Be wītra ni mazēi stātwei - tenā drezzi wissan sen naktin, beggi lāuksnas maigīnušas saūlin.

Tenā stalāi nagā
Kuntentī māise sīran
En stessei naktei
pilnai gezēiras
pilnai bijjas be stēisan skripintin dwarrin
Mes wīrtamai etkūmps ēmpiri
Na lunkins stēisan sembiskan stalkerin

Stēnseniskai buccauntei etwartīnsnas šaūsmans, gēidimai na nika kittan, tēr na Āustras zentlin. Be tūsimtai mettai wīrta en pelannin. As dwassiliwuns sen tuldīsnan... aupalluns Ten... ēnwangan.
Zwīriskai grazzin.

Be Saūli etskīja,
Mes etwartinna si en zarawīngin Zemmin,
Sen degāntins
Wārsans

*Papeisātan 2001 m. sillinas 22 d. ezze stan ka pastāi widātan en Sembai na Rantawas raggan en sillinas 21-22 naktin.