Prūsiska elagīja

Tebbei
skellimai grīman
lāukan ezze nērtingei mīlai -
adder timran, ezze rāudai
kārtan, kaīgi wajjan zālai
wilgan, kaīgi nāgas pjāusis
na krāntas grawwan, wõimenintei
pa ballai ānkstai wītrai,
degāntin pirzdau bītan -
twajjan nikwēigi ni ebgremtan
nīksnan, kwāi brukka nūmans en krāujan
kadāi, kāigi dēinas dabber wissas
kabēi pilnas stēisan erswāikstintan
malnīkiskan spīlin, supniskai tālas –
staddan en Taweīnas meddemans
kirša zallas jūres
spāinawintin bangūdelbin, kwei krūwa
nō mans dūmawintin ālkan bijā, pirzdau stabbans,
prei wūrai panirrusins
kapurnans, peraūgtans
pilligarbans, pa līpai,
zemmai ezze wūru, lāngei –
kāigi kabēi gērds en tenesses wippimans!
tīt en grīmamans stēisan wūran gennan
dabber kalsa,
ikāi di brendu eīskintun,
prawūriskwas waks –
kāigi izprettamai stwen
pāujantin, mēntai aubārwintan
paggerdas likkin!
Tīt ezze gillusmu
kalsu palīnka, spillusis,
kalsīkan gērdai!
Amzin
stēisan kīrsnan meddin,
brendei pillantin appin,
etwiran marrin be jūres!
Amzin
stēisan daggas lāukan,
kāimenin be naktime´ānis!
Amzin
stēisan Perkūnas, Pikullas
be sen wāltimans wainikkatas Patrīmpas!
Amzin,
kāigi ni aīnan, stesses tuldīsnas!
kāigi ni aīnan, ni aīnan! stesse gallas.
Amzin
stēisan tillintin meddin,
degāntin buttan, trēmptan
sīsenin, enkruwwintan struttan –
Amzin,
upperautan per swallinantin
mēldis kīrtin; pannus upjāi twajjan wakkan
petraūki –
Amzin
Krūwuns en krākintismu stāngan
dāncu pirzdau niwaīstas Dēiwas
Mūtin.
Adder kāigi
treppa gelzaīns karris
kirša meddin! pīdantei gālgin
pas tenesses Sūnun.
Emnei gērba ezze ten,
ertrēmptan Amzin, gārbapellakai,
appis, deznai niblīngas.
stabāi be pintei –
grīmas bītai be gārbas,
isturēitas rusisnā bilāi ten
be, kāigi undan en bāltu,
kāuke grīma, gurīna
rāudas paggan –
gurīna kāigi zukkaunikas tīnklatensna,
stesses sīwaskebbelinges, prābutskas
prei marrin, kaddan saūli
tēnka.

Klausītun enpeisāsenin