Dōnelaitis

Wassaras tuldīsnas
(“Metaskērdas”)

Jāu saulīka etkūmps etskīwusi swītan baudinna
Bē saltas zēimas pastangans grawīntei glaudāi si.
Stāi pasallai sen laddans jāu pagaūwa engēibtwei,
Ēn nika spāinawints snāigs wiskwēi jau ast wīrtuns.
Tīt laukans tepjai winnai aīnat gaiwinnantei glabba
Bē wisawīdans zalīkans wakēi ezze gallin etskītwei.
Guddis sen wissamans meddins pabuddusis ast ezze māigu,
Lāukan ir gārbai ir līndas aumetta jau kizzins.
Wissalab, ka en assan’s dergīsnai aulaūwa raudāntei,
Wissalab, ka en azzaru ilgi giwāntei perzēimau
Adder pa swajjai kīrnan bēçi per zēiman enmigguns,
Wissalab en pulkammans izlīzuns wassaran zmūnint.
Dukkei dīgi narittei iz saltan papāusan sin tēnsi.
Warnis be wārnai sen sarkins dīgi sen pūkins,
Pellis sen swāimans malnīkans be kurmjai teppiskwan gīre.
Mussas, grambūlai be kuššai sendrāugi sen tūlamans blussans
Mans jau preiwārgint etkūmps en pulkammans wiskwēi sin senrīnka
Be tīt rikijjans kai būrans engreūztun aūstans etwīri.

Klausītun enpeisāsenin