Prāts

Awīzis "Prūsas Tāutas Prēigara" pirmas nummeris pastāi drukkautan wassarinas mīnsin 1 dēinan stesse 1989. Tenesses gruntintajai bēi Mikkels Klussis, dīgi Ch. Sambōra. Sta bēi pirzdau 19 mettans. Mazīngi gērdautun, kāi emmens "Prūsas Tāutas Prēigara" ast jāu istōriskan. Stan kērdan sta arwiskai bēi "tikrā awīzi", kwāi pastāi drukkautan na papīran. Be kaddan teinū skaitāimai stans wūrans Awīzis nummerins, mazzimai ebzentlintun, kāi stāi artīkelai dīgi teinū ast spārts aktuālin pēr mans, ikāigi tenēi ast pastippan nawwan. Kīsmai teinū ast jāu šlaitawīdan, adder tūlin prōblamai palikka stan subban. Be ka bēi staddan, šandēinan jau ni ast mazīngi. Staddan Prūsas bangīnsna bēi maldan be turri swāise maldan spārtin. Teinū asmai Prūsas kultūris weldūnai be weldēimai wissan ka bēi staddan - en pirmasei Prūsas bangīnsnan, kaddan nūse bilā ezze 1982 m. pagaūwusi etskītwei etkūmps, tīt dīgi wissan ka bēi stwi en nūsei zemmin ezze wūramans kīsmans.

Dīgi subse emnes simbōliki ast spārts swarewīngi. Prēigara ast nūse galwas appi, kwāi tēnka pra pastippan Prūsan be gaūne undan iz wissans Prūsas galwas appins. Prēigara ast nūse lanzīntan Swītas Garrin, ka pakūnte pastippan sakrālin Prūsas struktūrin. Undan turri minīsnan. Undan ēn sen turri minīsnan ezze wissan, ka bēi stwi. Undai turri kōdans prei stesses zemmis erzināsnan. Ka ni bēi en lāiskamans, ast en undu. Prēigaras krāntai wisaddan bēi swintan. Stwen stalāi tūlin alkāi, swintai medēi. Šandēinan, kaddan en Prūsai wissan ast kliptintan, tēr stawīdai zmūnei turri Tikrōmiskwan buwīntwei stwi, kawīdai turri sāitan sen Prūsas sakrālin struktūrin. Galwasdelīks šisses struktūris ast Undan be wissan ka pastāne sāitan sen tenesse kliptinans pintins. Gintus ast stāi, kwāi turri stan subban energījas struktūrin en sebbei, kwāi ast en Prēigaras undu. Sta ast nūse amzis grunts. Niaīnuns stēisan swettin zmūnin ni mazīlai gaūtun pēr sin stawīdans zentlins, beggi sta ast tēr sīras astis. Sta wissan ast tēr stēimans, kwāi ēn sen jāu turri etbaudīntan zemmis tārin.

Tikrā baltiska kultūri dīgi izgūbi iz stans subbans energījas struttans be laūkans. Stāi sakrāla struktūri dāi nūmans swāise gērdans - zemmis emnins, billin, grīmans, dīgi pamīrisnans be izpesnan. Prūsai ast Prēigaras undas malnīkai. Kaddan bilāimai, gremmemai, mīrimai prūsiskai, staddan nūse sāitan sen kliptinan zemmis struktūrin ast drūktan. Staddan Prūsa etkūmps izēit iz gilluwan be mes etkūmps neikaūimai pa swāise Zemmin.

2007 sillinas 22 deinā,
Assanis Līges, kaddan bēi pagaūwusi
Debā Prūsiska Senskisnā stesse 1260 m.