Sakkis stesse 2011 mettas
COLLOQUIA BALTICA IV
Pūlas 30 d. - sakkes 2 d. en Galindas tāutai pra Prutenijas pīran pastāi segīta kōnferenciōni "Colloquia Baltica", enkwendau perjāja wisawīdiskai istōrikai be lingwistai iz delli Pōliskans uniwersitātins, Alnasteinin, Kaūnan be Mīmelin. Stawīdans Prūsas istōrijas be mitōlōgijas kōnferenciōnins Prutenijas pirā ōrganizijja eraīnans dwāi mettans be, kāigi sta ast preiīmtan en akadēmiskasmu swītu, enstwendau wisaddan jāt stāi subbai zmūnei en stawīdan "akadēmiskan urlaupan", beggi stawīdans prōjaktans segēi di wisaddan en pat tēmpraisimans dēiktamans, kāi būlai mazīngi ni tēr ensegītun si sen zinānin, adder dīgi gaūtun estetiskan engnessenin.
Šī Colloquia Baltica pastāi segītan en "pillai", nitāli ezze Niklaūkan be līkutan Iznōtas kāiman, prēi Beldaīnas azzaran. En pillai, "Galindias" emnes, buwinna arwiskas Kunnegs Izgūbs II, kawīds ast wūrs miliōnars, maldaisis būwinnuns ainuntkawīdan kērdan en Austrālijai prēi šamānans be panzdau paprettuns ka nika gillu ezze prūsans be galindans. Perjāwuns iz Austrālijan, kunnegs kaūpuns wūran burwalkan, kawīdse emmens bēi Bartellis, be segīwuns stwen debīkan infrastruktūrin.
Šandēinan sta ast waistā pōp-pils per spārts labatīngins turīstans, kwēi, labbai platīntei, mazīngi pastatīntun wisawīdiskans enwesselinsnans. Prēi perwaidīnsnan, mikšai, jāntei pra meddjan en pillin, mazzi pastātwei per penningans nōpaltan pra "pagūnans" be izwīlktan iz swāise autōbusan. Wiskwēi zūrgi pillin stalāi wisawīdiskas pōliskas pagūniskas skulptūris. Subs kunnegs wisaddan neikaūja ebwīlkuns kizzin be maūkuns warrjas karūnan.
Galindijas "Kunnegs" Izgūbs II
Interessanteisin en kōnferenciōnei bēi Rōbertas Klimkas waitjāsenis ezze Swent- saknes swintans azzarans en Prūsai.
W.Kulakōws iz Kunnegsgarban bilīwuns ezze nawwan kapurnan en Kaūpu. Nawwai aupaltas pawīstis en Kaūpu astits sēitan sen kursins be sta wissan astits, kāigi bilāi W.Kulakōws, debīka nawwinisku per zinānin. Kulakōws perjāja tēr per swāise waitjāsenin be, izrēizan panzdau, aujāja.
Prōfesori Daļļā Kiselūnaiti iz Mīmelis
Uniwersitātin be Mikkels Klussis.
Mikkels Klussis. En fōnu pōliska skulptūriska erōtiki
Prōfesori Daļļā Kiselūnaiti iz Mīmelis Uniwersitātin bilāi ezze kaūkans. Kaūkai ni astits pikullai, kāigi pastāi peisātan en prūsiskas billas pamīntlimans, adder arwiskai prawerruts laikātun dins per "līkutans būtibins". Panzdaums fakts ni bēits waīstan mitolōgijas zinānei be en kōnferenciōnei Prōfesōris Kiselūnaitis waitjāsenis segīwuns debīkan engnessenin.
En kōnferenciōnin dīgi perjāwuns Mikkels Klussis, skaitāwuns ezze Brunōnan.
Wassarins stesse 2011 mettas
METELLAS PLAŪDAI
2011 m. wassarinas 7 – 15 d. Metellin wanginna si sen plaūdans be sen spārtans wītrans: zūrgi wassarinas 7 d. en Kunnegsgarbas regiōnei Rōzinawai be tūlin kwēi prēi Prēigaras appin audāi si plaūdan.
