Wassarins stesse 2007 mettas
Katōliskas āumens en Mazūramans
En Mazūramans, en Skibnewas kāimu, 2007 wassarinas wangan stebbulin bēi preipallus. Ainā genā, turīnti trins duktins, kāigi wisaddan buttai pussideinan īda. Niggeistai stessei gennai galwā skrijja be pirzdau swajjans akkins tenā widāi wīdan, ezze kawīdan izgūbi gāilan swāikstan, be kirdēi tārin, bilāntin „jaīs be madlīs, tēr sta mazzi jūmans pagalbtwei“. Staddan Kristina (sta ast tenesses emmens) ebwīlka duktins be immi madlitun swāise wīran, kāi tāns dīgi ēilai en kirkin, adder tāns, gērdauntei, kāi tenesse rīkisna gulli, be kāi tenesmu jāu ast di ainawīdan, ka wīrst būwuns sen tennan, bēi palikkuns buttai. Kristina immusi duktins be bēi gūbusi en kirkin. Stwen jāu wisāi bēi madlīwuns be panzdau grīmi religiōniskans grīmans. Sta wis bēi ni ilgais, nikāi kelli stēisan minūtan dessimtans. Izēntei iz kirkin mūti widāi tūlin dūman kirša kāiman. Perēntei dīwais Kristina widāi, kāi teneīsan buttan degga, a wīrs ast ēntrai. Niainunts nika ni mazēi segītun, spārtan ugnis be dūmas paggan. Panzdau zmunēntei izwīlka wīran, kas bēi sparts ebdegguns be aulaūwa en špitlu. Wissan, ka stāi seimī turēi bēi sendegguns. Genā gērdau panzdau: „Dīnkun dēiwu, kāi dabber mes asmai gīwan“. Seimī ni turri kwēi giwītwei be ni waīda, kāigi tenēi wīrst giwītwei en zēiman. „Ikkai dēiws ni wīrst pagalbuns nūmans dabber rēizan, turri būtwei wīrstmai subbai aulaūwusis“, bilāi Kristina.
