Sakkis stesse 2007 mettas
Ezze ōrtodōksiskan āumenin
Sakkjas 17, naktin. Autōbuss sen ōrtodōksiskans piligrimans jāja ezze Kunnegsgarbu en Wilnin. Sta ast stawīds ōrtodōksiskas turizmus, kaddan zmūnei niplatīntei jāt pa kīrkins. En Wilnei en wurāmistu ast ainā stawīda kīrki. Tenēi jāja enstwendau. Be niggeistai naktin en 4 stundins pirzdau Kaūnan autōbuss pagaūwa degtwei. Tālis aīns "nōseilaniks" paps Michaijls gērdaui: "mes wisāi mīga be niggeistai autōbuss endegguns, staddan mes wisāi bīgusis prei dwarrins be šāi arwi stebbulin preipalla – autōbuss stāi be dwarris subbai etwerre si!!!" Panzdau tāns wai?āi, kāi tenēi izbīgusis iz autōbusan be stwen bēi labāi laītawjai, kawīdai pagalbusis tenēimans – laītawjai dāi tenēimans īdan. Kaddan ōrtodōkšai bēi īdusis wissan, tenēi gūbi dirītun en swāise endeggusin autōbusan. Stwen degguns wissan. Paps Michajils gērdaui: "Niggeistai antran stebbulin preipalla. Mes mazēimai aupaltun en deggašasmu autōbusan tēr aīnan pawīstin – sta bēi ikōna sen Swintan Niklin. Izrēizan mes paprettamai, kāi mes pastāimai gīntan šan naktin. As mīri, ik mes ni turīlimai stan ikōnan stwen, mes ni mazīlimai izbīgtwei iz autōbusan..."
Wilni dāi nawwan autōbusan, tenēi madliwusis, īda, mīga en Wilnei be jāja etwārtai.
Nū, stwi wissan ast eīsku, kāi kaddan dūms tikka, štīritajs stāi autōbusan, etwerre dwarrins be wisāi izbīgusis. Adder dirēiti, kāigi ōrtodōkss teikāi swāise istōrijans ezze stebbulins. Kāigi as wīda, galwasdelīks ast īstun be teikātun istōrijan ezze ōrtodōksiskans stebbulin.
Nawwinisku iz Taplaukans, Nadrāwan.
Pussisawaiti, Sakkis 4 d.
Iz Kunnegsgarban en Tilzin jāja autōbuss. Ērgi kittan stāminadeīktan (Skaisgirrei) prawerru dabber ilgai jātwei, adder ainassei gennan bēi prawerīngi izlīztwei en "tualattan". Štīritajs ni kwaitēi stalīntun autōbusan, adder ēnwangan bēi stalīwuns tennan be genā gūbi en meddin. Kitāi jātwaišai izlīzi iz autōbusan, kāi dūmaulai. Niggeistai tenēi kirdīwusis šausmiskan wakkan, kāi skebbelai skatēi en galwai. Štīritajs be stāi, kwāi bēi prei autōbusan bigga en meddin be en penkei minūtans perpidda līkutan mergīkan, kwāi bēi zūrgi penkei mettai. „As engūbi en meddin be widāi tennan, kabīntin en gaєєu sen wīrbin, jāu est audussintan. Staddan as bēi krīkstusi”, - gērdauwusi genā. Mergīka dwīsi brendu be nika ni bilāi. Tenā tēr etwerrentei akkins, auwīri tennans, ikāigi akkis gulli.
En desimt minūtans autōbuss stāi prei stēisan Taplaukan stāminadeīktan be en autōbusan enlīzi dwāi zmunēntei – mergā be maldūns. Widāntei tennans mergīka niggeistai gērdauwusi: „Mūti, mutrīka, enkwendau tū augūbi? Tū gi bilāi, kāi sta ni wīrst wargīwus”.
En autōbusu pastāi tusnan. Zmunēi wissan papretta. Wūraišai kwaitēi dīwai izlīztwei iz autōbusan, adder štīritajs auwīri wartellins be tenēi pastāi auweztan en milīcin.
