Līpa stesse 2009 mettan
Kurka, Wūrmis Perkūnas kērdasetrapan
Wūrmis Perkūnas kērdasetrapan (ezze līpas 16 dēinan ērgi kittan Perkūnan, līpas 24) ast Dagges sirdan. Mettan pagaūne wartīntun si teinū jāu prēi assanin be dags pastāi per wūrmin daggin. Ezze stan kīsman bilāi di „ankstāinai ast dabber dags, pussidēinan ast jāu adder assans“.
Wūrmis Perkūnas dēinan ast dīgi Rugipjaūwas pagaūsenes dāinas. Šan dēinan ni turēi di neggi pjaūtun neggi segītun kittans dīlins, kāi keitarā ni dēlblai āustan. Bilāi di kāi “Perkūns pjaūne pirman kurkan be pagaūne pirmans assanis swintikans”. Pirman kurkan palikka di kāigi upperan en laūku, wīntei iz din „bārdan“, uperaujāntei gēitin be sālin. Iz nawwan miltan segēi di lankīnan, "nawwan" gēitin.
Līpas 24 dēinan ast Rugipjaūwas wanginsnā. Ezze šismu kērdan pagaūne si dīgi sūjis kīsmus. Perkūnas dēinas sūji ast lankīnan be ebsergēi ezze enwārgsenimans.
Ezze līpas 24 dēinan bilāi di:
"Perkūnas dēinan nakts pastāi ilgais, undan pastāi saltan"
"Perkūnas dēinan īr stabs pastāi saltan"
Ōrtodōksiska kirki kwāi perwaldītun wūrans kirkins be pillins en Kunnegsgarbas skrittei
Līpas 10 deinā.
Per ka zēistun ka nika nawwan ik mazīngi imtun jāu wissan gattawan be niplatītwei per di. Jāu ast di waīstan, kāi Ōrtodōksiska kīrki kwaitēi īmtun sebbei ēst wissans pastippai restaurītans kīrkins en Kunnegsgarbu: Knīpawas Dōman, Wīzigarbas kīrkin (kwēi teinū ast Kunnegsgarbas Filarmōnija), Luīzis kīrkin be dīgi prōtestantiskas pīras buttan (kwēi teinū ast diskō klubs "Wagōnka"). Teinū kīrki kwāi dwāi pillins en skrittei: Geōrgenburgas be Šākas pillins. Pirmā pils ast izgraūtan, en āntrai teinū ast muzējan.
Mackāliska agentūri, ensegīnti sen kultūris „ōbjaktans“, jāu gattawina papīrans kwēi teinū wisāi “kultūris ōbjaktai” wīrst pastāwusis šlāitintan pa swarewīngiskwan be pa stan kas turīlai perwaldītun stans "ōbjaktans", kāi kīrki mazīlai īmtun sebbei ka kwaitīlai di.
Šlaitewīngei skrittes glāubai ast niestētisku be sta, kāi wissan wisaddan ast ni en swāise dēiktu. Ōrtodōksiska kīrki zēidusi sebbei "buttan" en Kunnegsgarbas sīrdu prēi wisēimans waīstan "pimpan", adder buttan ast tūls dānti palīgu (kāigi bilāi di en Kunnegsgarbu "kīrki turri 5 dāntins", beggi aūsas wūps ast stan subban per kīrkin be per aūsans dāntins). Stesse paggan prawerru teinū īmtun sebbei ka nika grazzu be prestīžan kāigi wūrans skrittes prōtestantiskans be katōliskans kīrkins.
Līpa stesse 2008 mettan
Balgas Kliptan
Balgā ast aīnan iz ukakliptinneisin deīktan en Prūsai, na Aīstinmaris krāntan. Ēnstwendau wisaddan jāt zmūnei šlaitawīdan pawīstin paggan: buwīntajai - etdwestun si en dabbai, kirsnāi archeolōgai - laukītun wūranins māntans, tīt dīgi "ekstrasēnsai" – enlaukītun energījan stwen. Gērbsenei gērba, kāi en 6 mts. šandau preiplūwa nūse kunnegans – Pratennis be Wīdawutis be stwen tenēi bēi zēidusis Ōnedas pillin be ensadīnusis swāise ensadīnsnans.
Teinū adder sta ast pāustan deīktan sen pillas izgraūsenins. Be en Sīmenes wangai stan deīktan pastāi blōkitan pra FSB be zmūnei nemazēi ēnstwendau enēitwei. Gērdaui di, kāi wūrasis zmūi iz Mikskātautan gērdau mackālamans, kāi waīdats, kwei prawerru stwen laukītun māntans. Be Līpas dwāi sawaītin stan deīktan pastāi blōkitan be niaīnunts ni pawakēi etwirai ka stwen arwiskai laukijja.
NSO KĪRSA AĪSTINMARIN
Līpas 27 dēinan: en Nōtangai sirzdau Wangītan be Kunnegsgarban na Aīstinmaris krāntan etdwesusis si tūlin zmūnei. Niggeistai adder en dāngu tikka NSO (Nepazinātan Skrāidantin Objāktan), kawīdan pastāi widātan zūrgi aīnan stūndin. Tennan sta kabba en deīktu, sta dīwai skatta. Zmūnei kintuppusis stan pawīstin sen swāise kūringins telapōnans.
