Gerbā ezze kittans swentans garrjans stēisan prūsan

§ V. As mīri, kāi per tennans bēi swentan wisawīdiskai garjāi, prēi kawīdans stibban dwejjina si be etkūmps senaūga. [...] En māise stankīsmiskasmu saddan, en Nībudimans, as turēi stawīdan rūmbiskan (sen senaūgusins wippins) krāusin; stwen as rēizan aupalla wūran zmūnentin, kas madlijja si pakwēlpuns prei garrin. Tāns ka nika miksēi pa bārdai, adder beggi as ni sergēi si be ni laikāi si prei pastippan tusnan be ēmpirsdirīsnan, tāns senmaisāi si be kwaitēi aubīgtwei. Adder as etlaikāi din tenesse retawīngiskwas paggan, kwaitīntei erzinātun, ka tāns segēi prei garrin. As prasijja tūlin, adder ēst gērdau dis swajjan (anga swettin) emnin be kāi astits iz Zamaītins. As endirēi, kāi tāns bijāi etskestun mi swāise pawīstins. Staddan aīnan swāiseisan patabbelin (tīt pastāne bilītan kummeţai, kwēisan ketturins Tenesse Praswāikstista Brāndenburgas Kurfirsts palīkuns per māise be kīrkis astins) wakēi as prēi din, kas turēi izlaukītun din sen labban, adder stan dīgi ni walnai izpalla. Ēnwangan, pa ilgans izwīngsenins, aīns iz māise patabbelins erzināi, kāi stas zmūnents pastāits tengīntan stwi ezze waidiluţţu iz Zamaītins: laipinnats tenesmu aupaltun stawīdan senaūgusin garrin per swāise nepūtin, pastāwusin klūmbin pra brendun lūzin, be staddan prawestun stan malnīkan pra senaūgusins wippins. Waīdils wīrstits izmadlīwus iz dēiwans warrin pēr stan garrin, stawīdasmu klūmbinsenin ārstitun b.t.t.
As laikāwuns si stesse zmūnentis līnku pastippai nipāusiskai be prasijja aūktais paminītan zamaītin, kasse paggan tāns bēi pakwēlpuns prei garrin be madlīwuns si. Tāns gērdau enwakīwuns Dēiwan, nadwessintei ezze pagalban per swāise nepūtin. As etrāi: labban, kāi tāns madlīwuns Dēiwan en stessei pawīstin, adder jāntei prei waīdilin, nadruwīntei na stawīdan nikānkstan pagalban, tāns laikāi si ikāigi nikriksţāns, be as preimetti din tenesse nietrāwingin laikāsenin. Wūrs zamaītis pagaūwa dribbintwei be wiptwei: tāns mīriwuns as wīrst din kāigi waīdilin senrissuns tengītun en pulkan; tāns immuns anktwei madlīntei etnīstin, dabber īr preidāwuns, kai teinū tāns wīrstits pastāwus izmāitintan anga pulkas līgas paggan, anga waīdilas ernertīsnas paggan, adder tenesmu nepūtin turrits būtwei wārgais. As adder eīskinuns tenesmu, kāi as ni mīri dātun din tēnstun prei swītewiskan sūndan, šlāit tāns turri tēr swāise grīkan prei Dēiwan aumadlītwei be aīns nō Din nadruwītwei, tīt Dēiws wīrst tenesmu nepūtin arwiskai galbtwei. Tāns mazzi nadruwītwei ir nō men, ik ter tāns swāise grīkan erzinālai, kāi as tenesmu ni tēr labban segīlai, adder sen pakkai preistatīnlai ēnstwendau, ēnkwendau tāns kwaitēi enpaltwei.
Staddan pra ginewīngiskan be kānkstan pamukīnsnan as ēnwangan erzināi ezze šismu wūran zamaītin, kāi sirzdau ainuntans zamaītins dabber ast drūktai ensadīntan, kāi stawīdai senaūgusis garēi ni umzus tīt stebbulai pastāi ezze Dēiwu teikātan be, pa tenēisan presnan, tikrōmiskai pastāne laikātan swintai, be kāi tāns mīriwuns, ikāigi astits serrīptan, kāi stāi, kwāi, pra tenēisan madlītajans be waīdilins pamukīntai (waīdils ast izpretewīngis wīrs, dīgi kalbītajs, kas pa tenesse presnan, kalba sen Dēiwan en madlai), stawīdan garrin tikrōmiskai teīsina, nikaddan ni astits pawērptan šlāits pagalban. Be stas zamaītis, kāigi as widāi, en swāise sīru palaikāi stawīdan presnan, ikāi teinū (mazzi būtwei iz bijjan) stan subban sirzdau kittans zamaītins pirzdau men perklantēi.
Ēnwangan tāns pazināi, kai waīdats aīnan madlītajan, kas, ik turīlai mazīngiskwan sen pakkai gaūtun šāi, prei stan garrin, buwīntwei, ni tēr kwaitīlai sen wissan swajjan seimīnan šāi perskītwei, šlāit īr mennei turīlai būtwei debīka deiwūtisku be tīt tālis. Stu mūisesan, ik tāns tikrōmiskai enswintinlai stan garrin. As prasīwuns, ka be kāigi zmūnei segēi, kāi enswintinlai stawīdan garrin. Stas wīrs gērba mennei retawīngins pawīstins, adder ezze stan as wīrst infōrmiwus labadīngewin skaitātajan en kitasmu deīktan.
Kai adder neggi stas zmūnents, neggi dabber ainunts ni turīlai mazīngiskwan etwartīntun si šisse garres paggan prei pagūnibin, as, tenesmu sēntei, laipinnuns wakītun swāise wāikans be aukīrstun stan gruntiskan wippin, kawīds stesmu zamaīţu bēi swarewīngi be kawīdse paggan stan garrin mazēi pastātwei laikātan per swintan, pēr kan zamaītis spārtai pawārgau. Prēi stan adder preipalla ka zentlawīngi: 1) kīrtantei wippin, mes wisāi stalāimai zūrgi garrin, kīrtants sadenīks adder ni bei ēmpirsdirīnti en tikran kērdan sāktwei prēipaus ezze krūwintismu wippin, be brendus wippis krūwa tenesmu na pīdans, kasse paggan tāns tūls nikāi ketturins sawaītins sīrga ni dilāntei nikawīdan dīlin, ikāi bei sījas kīsmus; 2) stesse paggan wisāi zūrgi stalīwušai senmaisāi si be augūbi, dīgi as, kāi pagalblai preignestasmu mūnentin, adder ankstāinai stas wippis jāu nikwēigi ni bēi.
As laipinnuns laukītun din seīlawingei ni tēr en māise kāimu, be dīgi as subs jāi en wissans kāimans, kwei kāigi as mīriwuns, tāns mazīlai pastātwei perweztan anga raweztan, adder ni ezze ainuntsmu as mazēi erzinātun nika tikriskan, ikāi as šāi be stwen izlaīduns īr penningans. Zamaītis dīgi iznīka, be as mīri, kāi tāns turēi aupīduns stan wippin. Pa kērdan nikas ni jāu prasijja ezze stan garrin adder gūbi prēi di šlāits malnīkans, kwāi ebgardau krāusins.

Klausītun enpeisāsenin