Dwāi laūmas

Dwāi laūmas spaktaūwa be pawērpi swāise plaugzdas rūkans. Pergūbi aīns zmūi be rānguns aīnas Laūmas rūkans. Aīnan naktin stāi mergā pergūbi prei din. Stas wīrs migīwuns be aupalluns stawīdan grazzin mērgan prēi sin be prasīwuns – kwēi tenā teinū pragūbi en buttan be tenā pawaidīnusi, kāi pralīzusi pra prālin. Zmūi immuns be auwīruns stan prālin sen karīgis lagzdan. Laūma delli dēinans bēi stwen ni mazīwusi izēitwei be ēnwangan pastāi per tenesse gennan. Tenā delli mettans buwīnusi sen stan zmūnin be jāu turēi sūnun. Aīnan rēizan zmūi aujāwuns. Tenesse mūti gērdau laūmai, kāi tenā astits spārts grazzu, adder laūma etrāi: mutrīka, ik tū widālai men en māise rūkamans, kawīda as bēi grazzu. Wīras mūti perpīda tenessei stans rūkans, laūma ebwīlkusi be bilāi mūterei: „Kīrdi tū, kāi en Ringai kalsāi kalsīlai?“. Teinū, bilāi, ik twāise sūns kwāi men widātun etkūpms, jaīsei tāns en glassis gārban pēr men. Gērdau be auskrāidusi. Wīrs pergūbi en buttan adder genā nikwēigi ni ast. Tīt tāns gūbi laukītun stan glassis gārban. Gūbi be ebtinka debīkan wīran. Tāns stesmu debīkasmu wīran bilāi, kāi laukijjats glassis gārban. Stas wīrs bēi subs kuks. Tāns pamirēi be gērdau: „jaīs prēi māise brātin“. Stas bēi debīkaisin. Stas wedduns wīran prēi glassis gārban, adder tāns ni turēi klaūtalins, kāi etwerīlai din. Stesse paggan tāns wartīnuns si etwārtai be stwi ebtīnka bittin. Bitti gērdau tenesmu, kāi waīdats kwēi ast klaūtalai. Tīt tenēi pergūbi prēi aīnan ragganan be zmūi palikkuns šlūzitwei prēi din. Stāi raggana gērdau, tāns turrits trins dēinans pūstun trins klantins, adder sta bēi tenesses duktis. Tenā gērdau, ik tāns wīrst segīwuns stan, tāns wīrst gaūwuns klaūtalins, adder ikkai ni, wīrst turīwuns galwan senkīrstan. En pirman dēinan wissan tāns segēi labbai, adder bītai kaddan prawerēi buttan gūntun klantins – iznikka klantis. Tennas bēi enlīzušas en guddin, adder bittis izgunnušas dins. En āntran dēinan stan subban – pastippan dēinan klantis ast šāi, adder bītai – etkūmps iznikka. Teinū tennas bēi enlīzušas en zigzdan, adder zangēi izgūnusis dins. En tīrtan dēinan tāns etkūmps pūsi adder bītai klantis etkūmps bēi iznikkušas be enlīzušas en undan. Stan rēizan rākai izgūnusis be tāns etkūmps gūnuns klantins buttan. Stāi raggana turēi pippelkan, be stāi turēi pāutan. En stesmu pāutan bēi klaūtalai. Be stāi pippelka mettusi stan pāutan en undan. Teinū stas zmūi jāu ni mazēi gaūtun din. Staddan rākai tenesmu perpīda stan pāutan. Tīt tāns teinū turīntei klaūtalins gūbi prēi glassis gārban. Adder stāi laūma gērdau, kāi ni mazzits jāu sēn din ēmpiri ēitwei, beggi per grazzu tenā ast be tīt tāns etwārtai wartīnuns buttan.

Labārtai, Mīmelis skrits. XIX mettasimtas wangā.