Sīmenis stesse 2009 mettas
Ezze Maskōwijai auplūwa salā
Sīmenes 26 dēinan bēi smejawīngis prēipalis. Ezze Maskōwijai en Ēstantautan niggeistai auplūwa salā. Na sallai aūga meddin be tenesses plattibi ast sūit debīkan - stwen būlai mazīngi turītun debīkan burwalkan. En zemmis dēiktu salā turri durpan be ast tēr pusāntras mētran gillu. Stāi „maskōwitiska“ salā plūja jāu turri būtwei delli mīnsnans en Narwas marrei be teinū preiplūwa prēi krāntan en aīnan ēstan kāiman. Zmūnei padirēi en langstan ankstāinai, adder pra aīnan naktin en undas dēiktu jāu izaūga meddin. Tīt „mackāliska“ teritōrija subba presta kwēi tenā būlai.
BERZIS DEINĀ BE KAUPŪLIS
Laīmas-laūmas be Perkūnas kīsmus
Bērzis deinā pagaūne laūmas kīsman – dwāi laūmas sawaītins, kawīdas ast Geguzzis swintikan ēmpirs sadīnsna. Stas kīsmus ast sēitan sen genniskans aspektans, kaddan Laīma gaūne swāise pilnan – laūmas - warrin, be sen undan. Laūmas kīsman gennas segēi šlaitewīngins genniskans dāinans be gūbi en kāimamans kāigi laūmas. Bilāi di, kāi laūmas sīnda en stawīdans dēinans na garrins be dirēi en mērgans. Dīgi wiskwēi ast kirdītan geguzzi.
Šin mettan pastippans dwāi laūmas sawaītins sūwa be bēi saltan.
Bērzis dēinan en Bānawas kāimu bēi interessantis prēipalis. Bītai niggeistai pagaūwa dumtwei ukaspartā wītra. Tenā dūmi zūrgi 10 minūtins be panzdau etkūmps bēi tusnai kāigi bēi pirzdau. En stan subban kērdan na pintin en kāiman krūwa warewīngis wūrs anzans be aulaūwa ukawūraisi en kāimu genā. Automōbilai, jāwusis prēi aulaūjantin gennan ni mazēi prajātwei anzanas paggan.
Antrā laūmas sawaīti ast sēitan sen genniskan waīdilisnan be stebekles undan be wanginna si dīgi sen šlaitewīngins genniskans dāinans – Laūmas enkappan.
Šin mettan laūmas sawaītis ēit entikriskai panzdau Geguzzis swintikans be wanginna si delli dēinans pirzdau daggas Saūlisstalīnsnan be Kaupūlin.
Dīgi, šin mettan, grumēi ketturei Perkūnai laūmas kīsman: Bērzis dēinan, kēitaras pussisawaītin, ketwirtikan be kittan rēizan jāu en āntran laūmas sawaītin. Teinū bēi eīsku widātan pannus Perkūnas aspēktan. En Prūsai Geguzzis swintikan be laūmas kīsman en šlaitewīngimans dēiktamans ēst eraīnan dēinan bēi tūlin ugnis. Tīt Geguzzis swintikan pirman dēinan, zallawas 1 degga meddin prēi Darkāiman, zallawas 15 dēinan, Geguzzis swintīkamans wangīwusimans degga meddin prēi Kunnegsgarban, en Kapurnikrūgu. Bērzis dēinan degga meddin prēi Russins be buttai en newinadesimtimans dēiktans en pastippai skrittei. Panzdau Bērzis dēinan, jāu kēitaras pussisawaītin, sīmenes 3 d., degga buttai en 5 dēiktamans, dīgi en Instruppilu, kittan dēinan – en Patallan - ugnis bēi en Kunnegsgarbu. Sīmenes 11 dēinan, en Wainikkans, degga ēst pastippa turīstiska bāzi “Kupai” en Kursiskamans Kūpans. Tūlin ugnis bēi dīgi en subban Laūmas enkappan sīmenes 15 dēinan.
Šin mettan mazīngi šlaitewīngi justun sēisnan sīrzdau laūmas kīsman be Daggas Sauliswārstas, Krīsas, Kaupūlis kīsman. Dīgi en Sauliswārstan be Kaupūlin en skrittei bēi zūrgi 9 ugnins. En Kaupūlis bītan en Ramintai grumēi Perkūns. Dīgi wins Kaupūlis dēinans pastāi tūls laūmas sawaītin winnu palīgu. Ni bēi saulītan, sūwa be wins pastāi spārts mārkan.
