Sallaws stesse 2009 mettas
Zemaītiskan wāitin en Mīmelai
Iz kaīran en tikran sinda dwāi
zmūnei iz zemaītiskan pārtijan, prūsai
iz Punskan: Lukōšēwičs be Bōndzis;
laītawis iz Wilnin
Sallawas 28 dēinan en Mīmelai zemaītiskas galwas pārtijas turēi swāise wāitin, kwēi turēits būtwei bilītan kāigi prawerīlai swintintun šin mettan Durbis ūlinsnas 750 mettan jubilējan, sēntin swarewīngi per baltan aīniskwan. Kaīgi bēi gērdautan en wāites pagaūseņu, en Durbis ūlinsnai, līpas 13 dēinan stesse 1260 mettan, būwusin prēi Durbis azzaran en Kuršai (teinū Līpajas skrits en Lattawas Kuzemmei) wisāi baltai immits delīkan be ebwarēits miksiskan urdenin. Tradiciōniskai peisāi di, kāi stan Durbis ūlinsnas mettan - 1260 - pagaūwa si Debā Prūsiska senskisnā. Adder prēi Durbin, arwiskai, iz bītasbaltans kareūwa tēr kuršai.
Kāi senrīnklai wissans baltans, en wāitin bēi perwūkautan wāišai iz Wilnin (sta ast - arwiskai laītawjai), Lattawan, Latgalin be prūsai "iz Pōlin". Izpretīngi, bēi interessanti erzinātun kas ast stāi prūsai iz Pōlin be, dīgi, kaīgi perwaidinna si zemaītiskan wāitin.
En waītin bēi senrīnkusis delli pōlitikai iz dwāi zemaītiskans pārtijans, wāišai be dabber penkei - uššai interesantei zmūnei, kawīdai pat ukatūls bilāi. Sīrzdau dins aīns bēi istōriks, kawīds spāts milāi emnin Sarmatija be nadāi ezze šismu mōmentan bilītun per baltans "sarmātai"; zemaītjai adder turīlaits būtwei "gettai", beggi astits peisātan en wūramans tāutaskartins ni "žemaitija" adder "samogethia". Kits bēi etimolōgs be tenesse prāts bēi, kāi eraīnan "-ra-" en baltiskamans wīrdans astits Egiptas dēiwas Ra emmens. Tīrts, laītawis iz Wilnin, kwaitēi, kāi per baltan aīniskwas zentlin pastālai swastika be dīgi kwaitēi din pawaidīntun Eurōpai kāigi pīgan. Tenesmu spārts padīnga perweztai pra latgalins pīrstinis sen wūrmins swastikans. Tīt, wissan waītin (ussins stūndins) mazīngi bēi kirdītun stēsan ussin zmūnin šlaitawīdans prātins.
Lattawiskas, dwāi zemaītiskai
be prūsiskas karengai
Prēi tikran: jātawjai Lukōšēwičs
be Bōndzis
Lattawjai, turīwusis skaitātwei referātans ezze etnōgrafijan, ni perjāja en waītin; sindīwusis latgalai tūls tusēi be dirēi aīns en kittan eraīnan rēizan, kaddan pastāi gēdautan stēisan ussin zmūnin ka nika wesselingi. Dīgi tusēi prūsai.
Kitā wesselingi pawīsti bēi ezze subban zemaītiskan. Jāu pīrzdau delli mettans zemaītiskas pārtijas pretta bilītun be peisātun en swāise wāitimans zemaītiskai. Subbai zemaītjai turri trins galwas dialāktans, eraīns iz stans trins - swāise izbilīsnans. Per draūgazemaītiskan bēi adder izrīnktan dialākts kwēi, kāigi en prūsiskai billin, ast "ei" be "ou" en laītawiskas "ie" be "uo" dēiktu. Nūmans bēi spārts interessanti kirdīun arwiskan zemaītiskan. Tīt zemaījai bēi segīwusis en wāitju wissan kērdan tēr zemaītiskan akcentan sen ei-ou, bilīwusis adder literāriskai laītawiskan.
Iz wissans prātins be referātins bēi interessanti tēr latgaliskas etnolõgas Iwaras Lōginas bilā ezze swintan gāban be dēiktan sen Perkūnas emnin sruktūrin en Latgalai. Kāigi en Sembai turrimai Alkāgarbans, palīgin struktūrin turri latgālai. Stwen ast Perkūnas garbāi, kawīdai wanginna si sen Perkūnas azzaran en zēimamans. Wisāi zmūnei, buwīnantei prēi Perkūnasgārbans, turri emnins Angs. Ezze stan astits mazzai izlaukītan, bilāi Lōgins. Na aīnan iz stans gābans stalāi kirki, kasse pastōrs en XVII mettassimtu ni dāi naikīntun wūran baltiskan stabban sen debīkan prūsnan, izdelbtan en din, be teinū stāi stabbas prusnā ast en kirkis zēistu. Prusnā ast prawūran baltiskan amulettan iz Niddan prusnamans palīgu, dīgi prūsiskan "babban" prusnamans. Lōgins mīri, kāi prusnā na Perkūnas gārban ast Perkūnas prusnā.
En subbai wāgan waitjāi prūsai. Sta bēi jātawjai iz Punskan. Aīns - Lukōšēwičs, kawīds etteikāi en wūrasmu pillisgarban nitāli ezze Punsku jātawiskan pillin be pastippan kāiman, dīgi segīwuns stwen pat uppereīnan en Alkas dēiktu. Āntars jātawis bēi Bōndzis. Tenēi abbai bēi iz "Jātawiskai-prūsiskan pīran", registrītan pīzdau delli mīnsnans be perjāja padirītun en zemaītjans, dīgi pawaidītun swāise pillisgarbas be kāimas auīmsenins. En auīmsenimans bēi widātan kāi wiskwēi tenēi turri peisātan ka nika tikrōmiskai prūsiskai. Tīt mazīngi bēi widātun en ainasmu dēiktan tūlin stabbans senprūsiskan wītingan emnins: Glabbis, Glāds, Mānts be t.t.
