Rags stesse 2010 mettas
LAUKĪNTEI RĀMAWAN... (ēmpirssadinsnā)
Adder bilāntei ezze Rāmawan, ni prawerru mīritwei, kāi bēi tēr ainā Rāmawa en Sembai. Kāigi ast waīstan, En Nātangas cēntru prei kāiman Patallai bēi Nātangas Rāmawa. Wārmis Rāmawa bēi prei Swēntamistan. En Nadraūwai Rāmawa bēi prei Aūsinis appin. Kitā Nadraūwas Rāmawa bēi prei Ramintas appin. Be dabber kitā Nadraūwas Rāmawa bēi prei Rāmanappis appin.
Adder ka teinū zmūnei segēi, niggeisati zināntei ezze stawīdans deīktans? Tīt prei perwaidīnsnan, ast mackālai rēide reklamawīntei si kāigi "šamānai-ekstrasensai", be aīns iz stawīdans ast kunegsgarbīns W. Ogorōdows, kawīds perjāwuns en Wārmis Rāmawan, pernaikīnuns stalīntin stwen uppereīnan, teīkawuns iz stans uppereīnas stabbans swāise "labirīntin", kumentīntei, tīt astits walnan per pastippan Kunnegsgarbas skrittin, beggi "labirīnts" dāstats "labban energījan".
Rags stesse 2009 mettas
Strāikai en Laītawai be Lattawai
Raggas 13-17 d.
Kāigi en Ringai, tīt dīgi en Wilnei, be kittan dēinan en Mīmelai bēi strāikai. En Mīmelai ni bēi ūlinsnas, tēr mītingan. Auktimmisku be wissan pastāi jāu perdātan en Laītawai, en Lattawai, dīgi en Estantautai. Brendu engērdautun, ka ast walnan. Prawerru, kāi prōtestai būlai, adder tīt nika ni dāst, beggi en strāikamans bēi tūlin prastai zmūnei, skinhēdai, pūwusis, bōmžai be tīt tālis. Ik sta būlai arwiskai radikals prōtests sen wissans klādans stēisan buwīntajan, staddan sta būlai kitā pawīstis. Adder tīt sta bēi kāigi akciōni anga "art-perfōrmanss", kwēi ēst eraīns zmūi kwaitēi turītun kintuppan ezze stan.
Wissan stan perwaidinna si kāigi absurditāti: raggas 13d. bēi pawīrpingiskwas deinā (jāu 17 mettai) be wiskwēi ast stas "teāteris" ezze patriōtizman sen panniskans, pōezijan, grīmans be krōnikan kāigi sōwetas zuldātai delbja laītawins, adder raggas 16 d. jāu telawizōrai pawaidinna kāigi pōlicaja delbja laītawins be wisāi ministerei gērdaui, kāi tenēi nika ni waīda.