Rags stesse 2010 mettas
Strāiks en Kunnegsgarbu
Raggas 30 st. 2010 m. bēi strāiks en Kunnegsgarbas cēntru, entikriskai prie Twānkstas pilligarban, en kawīdan pergūbi zūrgi 12 tūsimtai zmūnei, izkīninusis āupausintun maskōwas rikaūsnan en Kunnegsgarbas skrittei. Tīt dīgi bēi izkīninsna prēipausintun Puttinan ezze rikaūsnai.
Prīki Puttinan stalāi wisāi: stāi karengus sen arellins stēisan mōnarchistan bēi ēmpiri sen kīrsnans karenguns sen kērpetins stēisan bāikerin be t.t. Sta pawaidinna, kāi en strāiku bēi wisāi klādai stēisan buwīntajan.
LAUKĪNTEI RĀMAWAN...
Laukītun Rāmawan be kittans swintans deīktans, perwaidinnas, wisaddan bēi be ast sūit rōmantiskan per wissans zmūnins - ni tēr per zinānikans, adder per prastans, kawīdamans padīnga sensaciōnis be awentīris.
Tīt niwūrai aīnas Kunnegsgarbas awīzis kōrespondēntai aupallusis en googliskai tāutaskartei (en Sembai prēi jūrin) sūit retawīngin deīktan be izrēizan tenēi izjāja stwen "enlaukītun" din. Kāigi tenēi peisāi, sta ast ēst skrittan zūrgi 300 m. diamētris sen simetriskan struktūrin stēisan suppin be dubbin (stwen dīgi na auīmsenin mazīngi widātun 6 simetriskai lanzāntins līkutans "skrittans"-suppins be dabber en cēntru - "skrittan" sen sendātan suppin-"kwadrātan").
Kōrespondēntai gūbi stwen pa stan "skrittan" sen bio-rēman be enlaukīwusis stesse deīktas energījan. Tenēi ni widāi stwen nika kōnkretan, ka mazīlai tenēimans engērdautun - ka nō stan deīktan ānkstais mazīlai būtwei. Ast tēr suppjai - akrāta struktūri, pintei be nika kittan. Tēr wiskwēi dabber aūga niwurāi garēi - ābalnis. En aīnai dubbjai tenēi aupallusis sen swāise bio-rēman - spārts stūrnawan energījan be tenēimans sta segīwus spārtan engnessenin. Be tenēimans kāimawartīntei si, ezze stan deīktan papeisāwusis artīkelin, pilnan stēisan māgiskan jūtan, sen sūit aulamtan preizentlisnan - aupalāts Rāmawan anga dabber kittan swintan deīktan. Kwaitīntei padrūktintun swāise mīstiskan wersiōnin, tenēi wartīnusis si prei deīktiskan peisātajan W. Chrappan, kawīds kumentīwuns tenēisan laukīsnans, gerdawuīntei, kāi stwen en ebzūrwiskwai arwiskai astits tūlin prūsiskai swintai deiktāi. Adder tāns subs stwen anōmalijans nikaddan ni ebtikāts, be per tennan stāi deiktāi ast swarewīngi, wissan pirman, beggi stwen aūgats tūlin stabaskrimmas.
Izpretīngi, ezze stan artīkelin, zmūnei reagīwusis tūls skeptiskai, nadalāntei swāise wariāntins - ezze NSŌ (nipazinātans skrāidantins ōbjaktans), ezze būwuns karriskans ōbjaktans be t.t. Panzdau pastāi papeisātan "artīkelis-etkessenis", en kawīdsmu ainuntkawīdai zmūnei iz kāiman, lanzāntin prei stan deīktan, etmināts, kāi stwen ka nika bei, adder sta nijāu ast tīt swarewīngi. Swarewīngi, kai mackālai-kōrespondēntai ni waīda, kāi en 13 mts. stwen nitāli arwiskai bēi spārts debīkan Swintan Meddin, be stwen jāu nitāli bei spārts debīks Swints Laūks, na kawīdan arwiskai bēi Sembas Rāmawa.
Interessanti, kāi en Sembai sta ni ast stawīdan aīningiskan skrittan. Tenēi ast tūlin wisawīdiskai. Tīt, ppw., mazīngi iz kōsman widātun ka nika palīgu prei waīstan kappan Irtaikappinin, kawīds lānza prei wūran mīstan "Kāupan". Stwi ast stan:
